شريتو كبش العيد ولا مازال

بمناسبة عيد الأضحى المبارك اللي هو على الأبواب حبيت نسقسيكم بعض الأسئلة منها إيديرولي موضوع و منها نشوف عاداتكم و آراءكم تقرعيج



ـ شريتيو الكبش ولا مازال؟؟ لا كان مازال واش تستناو؟؟
ـ موالفين تخرجو الكبش و تلعبو معاه و توكلوه ولا يكفيكم أنو باباكم شراه و راكم كيفكم كيف الناس
ـ تتضاربو بالكباش برا و تقابضو بيناتهم ولا لا، هذا خطأ كبير يقع فيه الكثير من الناس



ـ تتصوروا مع الكبش و لا ماتقيموهش
ـ تحنيولهم نهار العيد ولا سيبالابين
ـ توالفو عليه و إيغيضكم كي يتذبح و لا تقولو عادي هذي سنة الله
ـ تشاركو فالذبيحة و غسيل لمصاغن و لا ياااااااااااااااااااااااااي
ـ تدخلو على اللحم نهار العيد طاف طاف ولا بشوية باش توالف ليسطومة المحرومة من اللحم اللي يجي من عيد لعيد
ـ تتصدقو من لحم كبش العيد و لا قص طراف طراف و خبي فالفريقو لنهار الشدة

في الأخير نغتم الفرصة و نقولكم صح ليكم اللي شراوا الكبش واللي مازالو يبداوا برك إيقلقو والديهم خاطر هاداك هو الوقت بعد، كون إيطولو يغلاو و مايقدروش عليهم، مع أنو كبش العيد وين يوصل نوصلو معاه
ربي يقبل الأضحية منجميع المسلمين واشيا برك لازم النية ماش خاطر الناس كل تشري الكبش أناتاني لازم أندير كيفهم، و اللي ماقدرش لا يكلف الله نفسا إلا وسعها والناس لبعضاها

بمناسبة هذا الموضوع أريد أن أهنىء الأمة الإسلامية بهذا العيد المبارك
شكرا أختي قطر الندى على الموضوع

مازال ما شريناش راهي الدراهم ماكنش في البنك . كي نشرو نتكلمو على الاسئلة الاخرى
قالك مرة واحد حب يشري كبش العيد بكري .ايا شراه بواحد 6 اشهر قبل العيد و جابو عندو للدار ولا هذاك الكبش يلعب مع الاولاد و يدخل للديار حتى والفوه و والفهم . من بعد كي قرب العيد بداو الناش يشرو في الكباش و لا هذاك الكبش يسمع الصياح عند الجيران .كي دخل مول الدار تكلم ليه هذاك الكبش قاله و احنا مازال ما نعيدوش